"یار رمیل، تم چائے بنانے آئے تھے یا کچن کی مرمت کرنے؟" اٹھا پٹخ کی آوازوں میں بلند آواز سے بولتا زرقان اندر داخل ہوا۔ "اسنیکس اور چاکلیٹس نہیں مل رہیں، ادھر ہی رکھے… تم نیچے کیوں بیٹھے ہو، اور اتنے صدمے میں کیوں ہو؟" رمیل جو بات کرتے کرتے پلٹا تھا، زرقان کو ایک ہاتھ سے سر پکڑے، فرش پر بیٹھے دیکھا تو فکرمندی سے پوچھتے ہوئے اس کے قریب بیٹھا۔ زرقان نے جھٹ اس کی گردن دبوچی اور منہ کچن کی طرف موڑا۔ "یہ سب کیا تمہاری ملکہ عالیہ نے صاف کرنا ہے؟" اپنی انگلی سے سارے بکھیرے کی طرف اشارہ کرتے ہوئے بولا۔ یہ سب… میں نے؟" رمیل آنکھیں پھاڑے کچن میں ہر طرف بکھرے برتن اور ڈبے دیکھ رہا تھا۔ "جی بیٹا، آپ نے… اور جو چیزیں ڈھونڈھنے کے چکر میں یہ حشر کیا ہے نا، وہ عازم لے گیا تھا۔ چائے میں لے کر جاتا ہوں۔ اور تم… اپنا بکھیرا سمیٹنے سے پہلے باہر مت نکلنا، ورنہ…" آخر میں تنبیہی گھوری سے نواز کر زرقان نے جھٹکے سے رمیل کی گردن چھوڑی اور خود چائے کی طرف بڑھ گیا۔ رمیل ایک ہاتھ سے اپنی گردن مسلتے دوسرے سے چیزیں سمیٹنے لگا۔ زرقان چائے لے کر پلٹا تو جلدی جلدی ہر چیز کیبن میں ٹھونستے رمیل کے دماغ میں جھماکا ہوا۔ "ورنہ کیا؟" "چائے نہیں ملے گی۔" پرسکون سا جواب ملا، جو رمیل کا خون خشک کرنے کے لیے کافی تھا۔ کچھ لوگ کہتے ہیں کہ چائے نشہ ہے جو چھوڑا نہیں جا سکتا، مگر کوئی رمیل سے پوچھے تو وہ بتائے کہ چائے آکسیجن ہے، جس کی کمی سانس لینے میں دشواری کا سبب بن سکتی ہے۔ چائے خون ہے، جو معمول کے مطابق جسم میں گردش نہ کرے تو دھڑکنیں سست پڑ جاتی ہیں۔ آخری کیبن کا دروازہ بمشکل بند کرتا رمیل لاؤنج کی