”ہیلو!“ ”السلام علیکم! مبشر سے بات کرنی ہے۔“ ” وعلیکم السلام! جی وہ گھر پر نہیں ہے۔ آپ کون؟“ ”میں اس کا دوست ہوں……میں پھر فون کروں گا۔“ ٭٭٭٭٭ ”السلام علیکم!“ ”وعلیکم السلام!“ ”مبشر گھر میں ہے؟ میں فرحان بول رہا ہوں۔“ ”جی وہ باہر گیا ہوا ہے۔“ ”اوہ! ٹھیک ہے۔ ویسے آپ کون ہیں؟“ ”جی میں اس کی بہن ہوں۔ وہ آئے گا تو بتا دوں گی۔“ ”ٹھیک ہے۔ اللہ حافظ“ ٭٭٭٭٭ ”السلام علیکم!“ ”وعلیکم السلام!“ ”میں فرحان بول رہا ہوں۔“ ”مبشر آج بھی گھر میں نہیں ہے۔ دراصل یہ وقت اس کے کھیلنے کا ہے اس لئے وہ کھیلنے چلا جاتا ہے۔“ ”ٹھیک ہے ۔ ویسے آپکو مبشر کی ایک بات بتانی ہے سوچتا ہوں بتاؤں کہ نہیں!“ ”کیا؟ خیریت تو ہے نا؟“ ”ارے کوئی پریشانی کی بات نہیں ہے۔ بس ویسے ہی…مجھے کچھ دنوں سے لگ رہا ہے کہ مبشر….!“ ”کیا؟…مبشر کیا؟ …بتائیے نا!“ ”وہ دراصل … نہیں! ابھی رہنے دیں۔ میں کچھ دن اور دیکھتا ہوں۔ کنفرم کرکے بتاؤں گا۔ کوئی ایسی ویسی بات نہیں ہے بس پڑھائی کا سلسلہ ہے…ٹھیک ہے …اللہ حافظ۔“ ”ہیلو!……. ہیلو……!“ اس نے کھوئے کھوئے انداز میں ریسیور رکھ دیا۔ مبشر عاشفہ کا چھوٹا بھائی تھا اور آٹھویں کا طالبعلم تھا جبکہ عاشفہ میٹرک کی تیاری کر رہی تھی۔ اب اس فون نے اسے پریشان سا کر دیا تھا۔ خیریت ہو، جانے کیا بات ہے۔ دل میں اندیشے جاگ رہے تھے۔ مگر بھائی ایسا ہے تو نہیں! ایک تسلی ہوتی تھی مگر پھر وہ الفاظ ذہن کو کچوکے لگانے لگتے۔ اسی ادھیڑبن میں وہ فون کے پاس سے ہٹ گئی۔ ٭٭٭٭٭ ہمت نہیں ہوئی تھی کہ بھائی سے کچھ پوچھتی۔ ویسے پوچھتی بھی تو کیا؟ کیا معلوم تھا اسے کہ جس کی وہ تردید یا تصدیق کراتی۔ رات بےچینی میں گزری، پھر کئی دن بھی بے تابی کی نذر ہوئے اور